मलाई लागेको लत चानचुने होइन



मलाई लागेको लत चानचुने होइन
काँडासँगको आदत चानचुने होइन ।

कति कुरुप देख्यो होला ढुङ्गा
अहो सिसाको नफरत चानचुने होइन ।

घरी हराउने, घरि मै सँगसँगै हिड्ने
मेरो छायाको हरकत चानचुने होइन ।

त्यसपछि कहिल्यै मुस्कुराएनन् फूल
पुतलीले दिएको खत चानचुने होइन ।

यो गाउँमा अझै चर्चा चलिरहन्छ हाम्रो
तिमीसँगको मोहब्बत चानचुने होइन ।

कुनै समय नदी हिड्थ्यो यो बाटो
अहो बगरको बिगत चानचुने होइन ।

खेम बगर/अछाम

प्रकाशित मिति : २०८१ माघ १९ गते शनिबार