कर्णाली प्रदेश सरकारले गत आर्थिक वर्ष २०८१/०८२ मा पूर्वाधार निर्माणमा कमजोर प्रगति गरेको छ ।
एक वर्षको अवधिमा २ अर्ब ५७ करोड ६६ लाख रुपैयाँभन्दा बढी बजेट खर्च गर्दै प्रदेश सरकारले न्यून मात्रामा सडक विकास गरेको हो ।
प्रदेशको भौतिक पूर्वाधार तथा सहरी विकास मन्त्रालयको तथ्यांकअनुसार, गत आर्थिक वर्षमा कुल ७२ किलोमिटर सडक कालोपत्रे गरिएको छ ।
९७.५९ किलोमिटर सडक ग्राभेल गरिएको छ भने गाउँ–बस्तीसम्म सडक सञ्जाल विस्तार गर्ने क्रममा ३१७.९ किलोमिटर नयाँ कच्ची सडक (ट्र्याक ओपन) खनिएको छ ।
यो बजेटमार्फत प्रदेशभर कुल ४२० वटा सडक योजनाहरू कार्यान्वयनमा ल्याइएको थियो । जसमध्ये सबैभन्दा बढी लाभ प्रदेश राजधानी रहेको सुर्खेत जिल्लाले पाएको छ ।
सुर्खेतमा मात्रै गत वर्ष करिब १९ किलोमिटर सडक कालोपत्रे भएको छ, जसमध्ये १२ किलोमिटर वीरेन्द्रनगरभित्रै निर्माण गरिएको हो ।
सडक निर्माणका साथै प्रदेश सरकारले पुल निर्माणमा पनि सफलता हासिल गरेको छ ।
गत आर्थिक वर्षमा मात्रै कर्णालीका विभिन्न खोला तथा नदीहरूमा १३ वटा पक्की पुल (सडक पुल) र नागरिकलाई आवतजावतमा सहज बनाउन ३४ वटा झोलुंगे पुल निर्माण सम्पन्न भएका छन् ।
प्रतिक्रिया दिनुहोस्