सुर्खेत। कर्णाली प्रदेश अस्पतालमा एमआरआई सेवा विस्तार भएको छ। शुक्रवार मुख्यमन्त्री यामलाल कँडेलले एमआरआई मेसिनको उद्घाटन गरेसँगै उक्त सेवा विस्तार भएको हो।
अस्पतालका निर्देशक डा.डम्बर खड्काका अनुसार हाल यो मेसिनबाट दैनिक आठ जनासम्म बिरामीको उपचार हुँदै आएको छ । २५ देखि ३५ जनालाई दैनिक जाँच गर्न सकिने यो मेसिन आर्टिफिसियल इन्टेलिजेन्ससहितको आवाजविहीन उच्च गुणस्तरको छ । आवश्यक परेको खण्डमा २४ सै घण्टा सेवा दिन अस्पताल तयार रहेको उनले बताए।
सङ्घीय स्वास्थ्य तथा जनसङ्ख्या मन्त्रालयले प्रदेश अस्पताललाई एमआरआई मेसिन खरिदको लागि बजेट उपलब्ध गराएको थियो । पाँच वर्ष ग्यारेन्टी भएको उक्त मेसिन नेपाली २९ करोड ७१ लाख परेको छ । मेसिन २०२३ मा निर्मित भएर परीक्षण गरिएको थियो ।
प्रदेश अस्पतालका अनुसार चुम्बकीय शक्तिबाट चल्ने अति नै उच्चस्तरको प्रविधि हो । यसले स्नायु, मेरुदण्ड, हाड जोर्नी, टाउको, शरीरका विभिन्न नसाको अवस्था पत्ता लगाउन सजिलो हुन्छ । त्यसले सही रूपमा रोग पत्ता लगाइ उपचार गर्न सजिलो हुन्छ ।
उद्घाटन कार्यक्रममा बोल्दै मुख्यमन्त्री कँडेलले प्रदेश अस्पतालका आगामी संरचना विकास र सञ्चालनबारे यो क्षेत्रका विज्ञसँग छलफल गरी अध्ययनपछिको यथार्थ रिपोर्टका आधारमा प्रदेश सरकार अघि बढ्ने बताए ।
उनले भने, ‘तथ्यले जे बताउँछ सो आधारमा काम गर्न हामी अघि बढ्नेछौँ । गर्नैपर्ने काममा सामूहिक निर्णय गर्न सबै तयार हुनुपर्छ ।
प्रकाशित मिति : २०८१ भदौ ३१ गते सोमबार
प्रतिक्रिया दिनुहोस्