एक पुरुषलाई ’हनी ट्रयाप’मा पारेर १४ लाख रुपैयाँभन्दा बढी रकम असुलेको आरोपमा सुर्खेत प्रहरीले एक युवतीलाई पक्राउ गरेको छ ।
पक्राउ पर्नेमा दैलेख नौमुले गाउँपालिका—८ घर भई हाल जिल्ला वीरेन्द्रनगर नगरपालिका—९ बस्ने २१ वर्षीया सिन्दु चन्द रहेकी छिन् ।
प्रहरीका अनुसार, पीडित पुरुषले दिएको जाहेरीका आधारमा चन्दलाई पक्राउ गरिएको हो । ०८१ भदौ महिनामा वीरेन्द्रनगर नगरपालिका–६ स्थित बुलबुले भ्यु होटलमा पीडित र चन्दबीच भेटघाट र सहमतिमै सम्बन्ध स्थापित भएको थियो ।
तर, पछि चन्दले त्यही सम्बन्धलाई हतियार बनाएर आर्थिक लाभ लिने योजना बनाएको प्रहरीको प्रारम्भिक अनुसन्धानले देखाएको छ ।
जिल्ला प्रहरी कार्यालयका प्रवक्ता तथा प्रहरी नायव उपरीक्षक (डीएसपी) मोहनजंग बुढथापाका अनुसार, चन्दले पीडितलाई ‘जबरजस्ती करणीको मुद्दामा फसाइदिन्छु’ र ‘नाङ्गो तस्बिर सामाजिक सञ्जाल र मिडियामा सार्वजनिक गरिदिन्छु’ भन्दै निरन्तर धम्की दिएकी थिइन् ।
यही डर र त्रास देखाएर उनले विभिन्न मितिमा पटक–पटक गरी पीडितबाट जम्मा १४ लाख २५ हजार रुपैयाँ असुल गरेको जाहेरीमा उल्लेख छ ।
पक्राउ परेकी चन्दलाई हिरासतमा राखी थप अनुसन्धान भइरहेको डीएसपी बुढथापाले बताए ।
प्रतिक्रिया दिनुहोस्