जेन्जीका मागहरू पवित्र थिए, स्वार्थी समुहबाट हाइज्याक गरियो : मुख्यमन्त्री कडेल

सुर्खेत– कर्णाली प्रदेशका मुख्यमन्त्री यामलाल कडेलले भदौ २३ र २४ गते भएको आन्दोलनमा जेन्जी पुस्ताका पवित्र मागहरूमाथि स्वार्थी समूहले हाईज्याक गरेको बताएका छन।

नेकपा एमाले जनसंगठन समन्वय संयन्त्र कर्णाली प्रदेशद्धारा आज सुर्खेतमा आयोजित भेलालाई सम्बोधन गर्दै मुख्यमन्त्री कँडेलले पवित्र उदेश्य बोकेका जेनजी समुहको ब्यानरमा निश्चित उद्देश्य बोकेका व्यक्ति र समूहले प्रविधिको दुरुपयोग म गरी बितण्डा मच्चाएको टिप्पणी गरे ।

‘ भष्टाचार नियन्त्रण , स्थिर सरकार र सुशासन जस्तो पवित्र उदेश्य र माग राखेका जेनजी पुस्ताको आन्दोलनलाई हामी सबैले सकारात्मक मान्नु पर्छ तर उनीहरूलाई प्रयोग गरेर देशको सार्वभौमिकतामाथि प्रहार गर्ने गलत कामहरु भए, जेनजीले पवित्र भावनाका साथ उठाएका मुद्दाहरु हाइज्याक र डाइर्भट गर्ने कामहरु भए,’ उनले भने, ‘निर्वाचित संस्था फालेर जेनजीको नाम भिर्नेहरु मन्त्री माग्न दुतावास धाउन थालिए, एउटा सार्वभौम राष्ट्रका लागि यो भन्दा लज्जास्पद अरु के हुनसक्छ ?, त्यसैले यो आन्दोलनले न अधिकार स्थापित ग¥यो न लोकतन्त्र र मुलुकको सार्वभौमसत्तालाई बलियो बनाउने काम ग¥यो ।’

हरेक आन्दोलन र क्रान्तिहरुले ल्याएका परिवर्तन गौरव गर्न लायक भएपनि जेनजी पुस्ताको आन्दोलनपछि भएको हिसात्मक गतिविधि कुनै कोणबाट पनि देशको हितमा नभएको उनले बताए ।
नागरिक सरकार गठन, सेनापतिसंग वार्ता, प्रतिनिधिसभा विघटन, मन्त्रीका लागि विदेशी संस्था र दुतावासहरुमा खुलेआम धाउन थालेका घटनाक्रमले जेन्जी भाई वहिनीहरूले गरेको पवित्र आन्दोलनको मान मर्दन गरेको पनि मुख्यमन्त्री कडेलको भनाई थियो। जेन्ज्जी आन्दोलनलाई आफु अनुकुल हाईज्ज्याक गरिएका घटनाहरू सार्वजनिक हुदै गएको बताउदै मुख्यमन्त्री कडेलले जेन्जि आन्दोलनका नाममा भएका आगजनी र तोफोडले मुलुकलाई दिर्घकालसम्म नोक्सान पुर्याएको बताए।

एमाले स्थायी कमिटी सदस्यसमेत रहेका कँडेलले जेनजी आन्दोलनलाई चुनौतीका रुपमा लिँदै पार्टी विस्तारमा लाग्न कार्यकर्तालाई आग्रह गरे । ‘यो नेतृत्व स्थापित हुने अवसर पनि हो, जनतामाझ जानुस, आफ्नो कुरा राख्नुस, जनताबाट सुझाव पनि लिनुस्, त्यसको मूल्यांकन पार्टी पद्धतिबाटै हुन्छ, नेतृत्वका कमीकमजोरी पार्टी कमिटीमै राख्नुस्’ उनले भने ।
भेलामा एमाले प्रदेश अध्यक्ष गुलाबजंग शाहले संकटको बेला नेतृत्वमाथि प्रहार गरेर पार्टीको हित नहुने धारणा राखे ।

‘नेतृत्वका कमजोरी हुन सक्छन् तर मुलुकको सार्वभौमसत्ता रहने की नरहने, संघीय लोकतान्त्रिक गणतन्त्र रहने की नरहने परिस्थिति सिर्जना भएको अवस्थामा नेतृत्वको रक्षा गर्दै अघि बढ्नुपर्छ, शाहले भने, ‘विचलित नभई कार्यकर्तामाझ जानुपर्छ, के–के कुरामा सच्चिने, कसरी सच्चिने त्यो विधि हामी आफै तय गर्न सक्छौं, अहिले निराश हुने बेला होइन ।’

जनसंगठन समन्वय संयन्त्रका संयोजक एवं पार्टी प्रदेश कमिटी उपाध्यक्ष टेकराज पछाईले पछिल्लो परिस्थितिमा कर्णालीमा पार्टी थप एकताबद्ध भएर अघि बढ्ने बताए । भेलामा विभिन्न जनसंगठनका पदाधिकारीले बदलिँदो परिस्थितिमा पार्टी नेतृत्वले लिनुपर्ने रणनीतिबारे सुझावहरु दिएका थिए ।